serena spera

uolhos colgados de preguntas i de azul

son inda argolha

adonde arde ua serena spera.

suonhos de paixarina

sola al meio l mundo,
queda inda l ancarrapitar
por eilha arriba;

porquei bés la cebolha que se muorre,
agora que sultou sues alas
i ansaia nuobos bolos?

porque ha de ser boubo
un suonho de cebolha an modo paixarina,
gastando to la fuorça a berdegar?



Ua cebolha na preinada by João Bandarra

morgaços para ua cumposiçon

agarrar las lhinhas que chúben de la boca als uolhos fondos, atar la cabeça an nuolos de sangre, oupir las narizes cumo un sereno bózio, fondos dun azul zlido, al loinje, que nun hai meia de s'achegar al resfuolgo de ls dies.

La belheç by João Bandarra

feitiços … ou l zgrilar de l tiempo

inda quando l tiempo yá le robiu ls uolhos

i solo an búltios negros bólan pula nuite,

quédan feitiços sien nome a berdegar

ne l milagre de nacer quando se muorren

riestra de cebolhas by jonsta

traies la huorta al cuolho... outro modo nun tenies de criar bida

traies la huorta al cuolho
las manos agarradas al milagre
que a cada anho te traie la tierra mai

i era te cada sachada un carino
l'auga pul suco sangre que te corrie
la spera pul crecer i nuobo fruito

magie cun que calcies l tiempo
i adiabas la derrota que ls uossos ouliában:
outro modo nun tenies de criar bida

bien que dígan la nuite scura... ye la lhuç ua lhuç

staba scuro cumo 
ua nuite


acontra la candela acesa 
pula rue
rugien las airaçadas,
dában ls miedos sues risadas


nunca ua lhuç fui outra cousa por
bien que dígan

úpen se de la tierra froles .... serenas cumo diusas griegas

naide çcubre l mistério de
las státuas de l'Ilha de Páscoa,
çque perdírun la quelor 
de adonde le manaba l sangre:


úpen se de la tierra froles
burmeilhas de bida, negras 
de tristeza i de canseira, serenas 
cumo diusas griegas an sou altar:


pul burmeilho cuorre l sangre,
ye l negro ua lhembráncia de la fuonte,
seinha de la Tierra a que perténcen,
menumientos de tiempo i de saber.

tierra de froles by João Bandarra

ua mundiada de quelores... ye la fiesta de ls uolhos i narizes

ua mundiada de quelores fui se oupindo
tsunami que arrastra risas serenas
i queda l aire cula barriga chenas d'oulores
a ferber cumo giente an feira d'anho 
i denheiro ne l bolso


eiqui nácen to las cintas de la raposa
i l cielo queda rente al suolo a cebar se
mais que an anho d'auga ls burros pulas bordas
ye la fiesta de ls uolhos i narizes
a albrotar las arribas


abaixa debagar, serenos deixa ls pies
lhebar sou tiempo: ye berde l fondo,
negros inda s'assóman ls uolhos de las peinhas,
al speilho de l Riu, son brancos, roixos i amarielhos
xaras, tomielhos i scobas


se burmeilhos arrbéntan, son fedieiras,
un berde acrregado a botar ua risa amarielha,
carrasqueiras, i ls nebros ándan boubos
a eiletraficar sou berde i a sonhar 
nius i bulhaquitos


todo ha de chegar a la punta de riba
cul scachar de la frol de cepas i oulibeiras:
ha de assoprar un criançoso aire
i até l san Juan quedará borracho
de fogueiras, oulores i cantigas.

assóman se centinelas ... bistas ancantadas

calhadas, assóman se centinelas, 

sous rendidos braços tamien uolhos

cégan de guapas las bistas

ancantadas nun pérden sou ancanto:

arribas de l Douro

freznos que alhá de freznos subertírun

menhires? i quien sabe a que diuses apúntan?
citotes? i que tierra ou mundo quieren fecundar?


pura sprança de primabera,
an beç se de quedáren a chorar sous galhos.


centinelas de ls cerrados, nien ls diuses eigícios
tanto tubírun, nun ten la tierra outro
tan fuorte resfuolgo, tan lhargo bózio.


ande un mirandés por adonde andubir,
tembra siempre al ber un fresno
i sou oulor ye puorta para antrar an casa.


pones un frezno na paisaige i eilha
queda por milagre mirandesa.

i un bózio quedou aceso .... para spetar las lhembráncias

i un bózio quedou aceso
perdido pula prainada:
stában ls oubidos tapados,
del naide se dou de cuonta;


i quedou colgado l bózio
dun tiempo que nun ten tiempo,
puro lhume a arder na nuite,
fuolha de faca aguçada;


nun te calhes que algun die
sou retombo han de antender
ou que quede feito spino
para spetar las lhembráncias

ye suonho l'arte sola que çcubriste de bolar

spera l cuorpo la semiente, huorta

adonde ls suonhos nácen: se loinje

bés l fruito talbeç te habas afeito

a perder te brugo pula tierra, que

ye suonho l’arte sola que çcubriste

de bolar.

nunca ye demás l suonho ou fame

del, nien miedo tengas de nun sentir

las pisagadas an beç d’alas que

te lhieban a ti, cumo paixarinas

an sou bolo boubo de quelores

na prainada.

saberás un die quantos sós,

quantas andadas de mundo

te fazírun, quantas bidas puodes

parir te sien que nunca te benga

la menopousa, que te fazes cadena

cun tou cuorpo?

deixa la puorta abierta a quien

benga, i se nun tubires cena

dá le un suonho an modo de risa:

antoce puodes salir de ti, i será

bomba a arrebentar cadenas a prender te

para siempre.

será tou scudo l suonho, perdiçon

que te salba i faç l mapa adonde

puodas andar l tou caminho:

para alhá la selombra i l puolo

adonde ls bózios te cundánan,

tu rebibes.

an tue lhuita por salir de l lhapo,

siempre acharás puorta i mundos

outros que solo seran tous

cunsante ls fagas, cunsante ls sonhes,

que tanto bonda pa que te buolbas

criador.

selombra azul by jonsta

silenço sien fin... zaspero que mos nace i que mos muorre

traie siempre cun el un silenço, para quando las palabras deixáran de dezir: un die, medrou le alhá de ls uolhos i quedou solo quelor sien campo adonde caber, zasperado cumo prainada sien raia an busca de sues bordas.

patrielhas ... ou l tiempo a fazer renda

patrielhas puls tuoros,
renda feita d’aire i tiempo:
monte an abandono.

papoulas ... suonho de cereijas

chubírun se papoulas
a pingar sangre nas arbles:
tiempo de cereijas.

suonho de cereijas by LsMielgos

un azul d'antramoceiras... ou l aceinho doce de bolber a casa

a las bezes dá-me la mano
un azul de antramoceiras flores,
relhuziente cumo l cielo
deitado n’ourbalheira,
l sol inda a querer rumper
i l berde de las yerbas
anrebulhado nua selombra mansa:

l mistério de la tierra que sperta
arrepiça la piel i l aire
a abanar l pendon de las yerbas
ye l aceinho doce de bolber a casa.

azul de antramoceiras by LsMielgos

ua mulhier al loinge

bai ua mulhier al loinge

búltio pul tiempo negro zlido

ua de puolo rala nubre beila

ne l arrastrar de ls pies

nien abánan al aire las puntas

cun que prende la cabeça l lhienço

bai ua mulhier al loinge

puntico adonde bidas s'anobielhan

nuolo que assegura mundos

cuostas buoltas a quien bei

lúria de feturo antrelaçada

eisséncia de fincon quando parada

bai ua mulhier al loinge

deixa un rastro de páixaros

puls cunhos frol até ls delores botan

de l silenço modas inda nácen

i cada passo acende l ampeço

de mundos que hai remiles d'anhos deilha nácen

bai ua mulhier al loinge

quien sabe de que mundos

quien sabe de que einfiernos

quien sabe pa que cielos...

l que quedou ou... san juan an modo d'eilegie

faziemos cascatas, ua fogueira sagrada
al modo para queimar sarna, calcer
suonhos ou arrolhar cantigas, i 
bandeiricas de jornal porriba la rue 
coladas a pan an guitas negras yá 
afeitas al aire d'habéren chubido
cun foguetes: de todo quedou 
l bolar, la risa sacudida al aire,
la fé an purmanhanas d'ourbalheira.

san juan an modo d'eilegie by LsMielgos

las amportanças an sou sítio... ua manhana ou ua tarde por anho

giente nun para de ir i de benir, sperando eiternidades an salas, cumo quien fui a saber de ls uolhos, perdidos yá nun sabe adonde; dun abion de naspas sálen ambrulhos lhargos metidos an sacos negros, cerrados cun corrientes; de las ambulanças assóman-se bumbeiros çarumbatos, als ambarrones a cadeiras cun bielhos de piernas tapadas por cobertores; l abrir i cerrar las puortas altemáticas speta-se acontra la pacéncia colgada dun nome a chamar ne ls altefalantes i las rábias abafadas azinólhan-se nun altar de silenço que s'assonheriou de l aire: solo un tiu al meio parece un manijero de delores, sue choupa de canhafrecha oupida cumo cetro anriba un trono de cadeira de ruodras i coronado de tristeza; puls corredores, macas perdidas bólan an gemidos, sien que al menos las mire aquel mundo cun tanto que fazer, assi i todo sereno cumo debe de ser l antes de la fin de ls mundos; nun para l soro de pingar puls piquetes de delor, mas subirte le l bruído de pingas que s’arráman porriba l telhado prefabricado, abiesso a porrascadas; lhargas son las mudanças de turno, puis nun hai modo de cuntar l tiempo nas ourgenças de ls spitales, puis até ls minutos sáben a eiternidade: nun fura la cámbria dun tiu a sacudir la pierna anquelobrinada i naide se haberie rido an todo l die; inda bien que nun lhebei un lhibro para ler, puis yá muitá ls uolhos nun se fartában assi de ber i de pensar: todo mundo habie de passar ua manhana ou ua tarde por anho na ourgença dun grande spital: talbeç ajudasse a poner las amportanças an sou sítio.

arte de la bida hounesta... que te puoda mantener sereno i anteiro

ye l atento al camino que te lhieba l manadeiro de la fuonte de sabedorie: naça esta de ti ou doutros que cuntigo ou antes caminórun, nada quier cuntigo se nun le abrires la puorta de tue casa ou tan cheno stubires de ti mesmo que nada mais alhá puode caber; miras un rostro an todos sous cachicos i nessa lhazena puodes abrir las gabetas de l saber que alhá se fui ancundesando: l mirar sereno, cuntento ou triste, de miedo ou cunfiante, ganha uas alas que le aguántan la lunjura; ls passos puoden nien siempre acertar l camino, mas sáben tornar atrás i cuntinar, nua busca sien paraige anque pesados pula polareda de ls caminos; l modo cumo ajeitas ls beiços para arrolhar las palabras ou l modo cumo peinas l pelo culs dedos i te zbias de las squinas cun que l tiempo te bai aguçando delantre de las cousas i la giente; an todos esses remissacos se puode ancundesar la sabedorie, mas l caso ye que la baias apedurando sien paraige, dun modo hounesto, que nunca la sabedorie puode ser cumplicada: esso ye pa ls lhibros adonde l saber solo guarda sous scaletos i ye pena que te inchas dua bana proua solo porque ls conheces; la sabedorie quier te siempre porsor i aluno, eilha ye siempre cunquista tue, até que un die se ambuolba cul modo cumo miras i respiras, cul modo cumo stás atento al mundo i a todos ls que nel cuntigo bíben: ye essa arte de la bida hounesta que siempre te puoda mantener sereno i anteiro.

atento al camino by LsMielgos